Qərargahı Parisdə yerləşən «Sərhədsiz Reportyorlar» Beynəlxalq Mətbuat Azadlığını Müdafiə Təşkilatının iyunun 12-də yaydığı bəyanatda qeyd olunur ki, ötən cümə günü AXCP-nin piketində bir neçə jurnalist saxlanıb və bir qədər sonra buraxılıb. Sənəddə bildirilir ki, iyunun 9-da AXCP-nin bir qrup fəalı «Bizim Yol» qəzetinin baş redaktoru Bahəddin Həziyevin oğurlanması və döyülməsinə etiraz olaraq aksiya keçirib.
Mayın 30-da isə bir qrup jurnalist belə bir aksiya keçirmişdi.
Təşkilatın mövqeyinə görə, yerli və beynəlxalq təzyiq nəticəsində Daxili İşlər Nazirliyi mayın 23-də bildirib ki, cənab Həziyevə hücum araşdırılacaq.
«Bizim Yol» qəzetinin baş redaktoru Bahəddin Həziyev mayın 19-na keçən gecə evinə gedərkən naməlum şəxslər tərəfindən oğurlanaraq döyülüb. Faktla bağlı cinayət işi açılıb, işin istintaqını Abşeron Rayon Polis Şöbəsi aparır.
Hazırda Bahəddin Həziyev müalicə olunur.