Dövlət Departamentindən də alqış gəldi
ABŞ Dövlət Departamenti hüquq müdafiəçisi İntiqam Əliyevin azadlığa buraxılmasını alqışlayır. Departamentin sözçüsü John Kirby martın 28-də deyib ki, Birləşmiş Ştatlar Ali Məhkəmənin hüquqşünası şərti cəzayla azad etməsini alqışlayıb:
«Daha öncə, martın 17-də isə 10-dan çox digər məhbus buraxılmışdı. Hökuməti fundamental azadlıqlardan istifadə etdiyinə görə həbsə atılmış digər şəxsləri də buraxmağa, buraxılanların hərəkət azadlığına məhdudiyyəti qaldırmağa çağırır, Azərbaycan hökuməti ilə əlavə müsbət addımlar üzərində işləməyi səbirsizliklə gözləyirik».
Martın 28-də İntiqam Əliyevin həbsi 5 il şərti cəza ilə əvəz edilərək azadlığa buraxılıb. O, 2014-cü il avqustun 8-də həbs olunmuş, qanunsuz sahibkarlıq, mənimsəmə, vergidən yayınma kimi ittihamlarla 7 il 6 ay azadlıqdan məhrum edilmişdi.
F.Mogherini :“AB ümid edir ki, bu addımlar davam edəcək”
“Avropa Birliyi ümid edir ki, bu addımlar davam edəcək. Bunu Azərbaycanın götürdüyü öhdəliklər tələb edir ”
Avropa Birliyinin Xarici işlər və təhlükəsizlik siyasəti üzrə ali nümayəndəsi Federika Mogherini hüquq müdafiəçisi İntiqam Əliyevin martın 28-də azad olunması ilə bağlı bəyanat yayıb.
“Son iki ilini həbsxanada keçirən insan haqları üzrə vəkil İntiqam Əliyevin azadlığa buraxılması qərarı bu ayın əvvəlində siyasi partiya, QHTvə jurnalistlərin azadlığa buraxılması ilə bağlı əfv sərəncamından sonra Azərbaycanda daha bir müsbət irəliləyişdir” - deyə F.Mogherini bəyanatında qeyd edib.
APA-nın xəbərinə görə, Avropa Birliyi rəsmisi bu addımların uzun zamandır ki, gözlənildiyini qeyd edib:
“Bu addımlar uzun müddətdir gözlənilirdi. Avropa Birliyi ümid edir ki, yeni həbs olunmuşların, siyasi səbəbdən ölkədən çıxmasına qadağa qoyulmuş şəxslərin tam azadlığa buraxılması və reabilitasiyası ilə bu addımlar davam edəcək. Bunu BMT-nin, ATƏT-in üzvü olan Azərbaycanın götürdüyü öhdəliklər tələb edir. Azad vətəndaş cəmiyyəti ölkənin rifahı və sabitliyi üçün vacib töhfə yaradır" - F.Mogherini bildirib.
Federika Mogherini fevralın sonu martın əvvəllərində Azərbaycanda səfərdə olmuşdu. “Cənub Qaz Dəhlizi” Məşvərət Şurasının iclasına qatılan xanım Mogherini prezident İlham Əliyev və bir sıra dövlət rəsmiləri ilə də görüşmüşdü.
