Mariupolda mülki əhalinin təxliyyəsinə başlanılır
Mariupoldakı əhalinin təxliyyəsinə saat 12:00-dan sonra başlanacaq. Bu barədə şəhər şurası məlumat verib. Təxliyyənin həyata keçirilməsi üçün tərəflər martın 6-sı saat 10-dan saat 21:00-a qədər süküt rejimi elan ediblər.
Beləki martın 5-də əhalinin təxliyyəsi ilə bağlı elan edilən sükut rejimi baş tutmayıb. Sükutun pozulmasında tərəflər bir-birini günahlandırıb.
Ukraynada Rusiya ordusuna qarşı aksiyalar
Xerson vilayətinin Nova Kaxovka sakinləri etiraz aksiyasına çıxıblar. “Azadlıq” radiosunun Ukrayna xidməti xəbər verir ki, əllərində Ukrayna bayraqları olan etirazçılar Rusiya ordusunun tutduğu meriyanın binasına doğru hərəkət ediblər. İnsanlar “Rus gəmisi, get”, “Yeni Kaxovka Ukraynadır” deyə qışqırırlar.
Oxşar mitinqlər Geniçesk rayonunun Novoalekseevkada və Xersonun özündə də keçirilir: orada insanlar Xerson administrasiyası ilə üzbəüz “Ukrayna” kinoteatrının yaxınlığında toplaşıb, “Ukrayna!”, "Ukrayna!" şüarları səsləndirirlər.
Qazaxıstanda müharibə əleyhinə aksiya keçirilib
Rusiya ordusunun Ukrayna qarşı apardığı hərbi əməliyyatlara qarşı Almatıda etiraz aksiyası keçirilib. Müxtəlif məlumatlara görə, aksiyada 3 mindən 5 minə qədər adam iştirak edib.
Etirazçılar əllərində "Yaşasın Ukrayna", "Müharibəyə yox", "Putin Haaqa, həbsxana". Qaldırılan plakatlarda əsasən müharibənin və Putinin dayandırılması tələbləri olub. Bəzi etirazçıların qaldırdıqları plakatlarda "Əgər indi müharibə dayandırılmasa növbəti Qazaxıstan olacaq" kimi müxtəlif şüarlar da olub.
Mitinq təşkilatçılarından biri Daulet Abılkasımov tribunadan bəyan edib ki, bu mitinq Rusiya və Ukrayna xalqına qarşı yox, Putinə və müharibəyə qarşıdır .
"Putin öz ambisiyalarının əsirinə çevrilib. Bu müharibəni o başlatdı, indi həm ideoloji, həm də hərbi cəhətdən uduzur. Biz burada heç bir millətə qarşı deyilik. Biz nə ruslara, nə də ukraynalılara qarşı deyilik. Biz Putinə qarşıyıq. Biz sülh tərəfdarıyıq”, - bildirib.
Ukrayna Silahlı Qüvvələrinin Baş Qərargahı: Fevralın 24-dən bəri 11 min Rusiya əsgəri ölüb
Ukrayna Silahlı Qüvvələrinin Baş Qərargahı müharibə başlayan gündən-fevralın 24-dən bəri 11 min rus əsgərinin öldüyünü bildirib.
Baş Qərargahın yaydığı məlumatda vurğulanır ki, hərbi əməliyyatların yüksək intensivliyinə görə hesablama mürəkkəbdir və məlumatlar dəqiqləşdirilir.
Məlumatda həmçinin “Rusiya işğalçı qoşunlarının 650-dən çox yaralı nümayəndəsinin cəbhə xəttindən xəstəxanalardan birinə çatdırıldığı” bildirilir.
Rusiya Müdafiə Nazirliyi sonuncu dəfə martın 2-də itkiləri ilə bağlı məlumatları dərc edərək, 498 hərbçinin öldüyünü, 1597 nəfərin yaralandığını bildirib. Rusiya Müdafiə Nazirliyinin məlumatına görə, Ukraynanın itkisi 2870 , yaralıların sayı isə 3700 nəfərdir.