İranda etirazçılar Novruz bayramından əvvəl gələn sonuncu çərşənbə ərəfəsində küçələrə çıxaraq yeni aksiyaya başlayıblar.
İranda "Çərşənbe Suri" adlanan gün Azərbaycanda daha əvvəl keçirilən “Od çərşənbəsinin” ekvivalentidir.
Tehranın Ekbatan məhəlləsində etirazçılar martın 14-də yenə də “Diktatora ölüm!” və “Mübarizə davam edir!” şüarları səsləndiriblər.
Paytaxtın Ekbatan məhəlləsi son altı ayda antihökumət etirazlarının episentri olub.
Burada bir neçə gün bundan əvvəl sosial medialarda yayılmış videoda 5 qız hicabsız rəqs edirdilər.
Bu video o qədər populyarlaşıb ki, ölkənin müxtəlif yerlərində eyni mahnının sədaları altında rəqs edən başqa qızların videoları yayılıb.
Bir çoxları qızların bu hərəkətini “təhlükəli itaətsizlik aktı” kimi qiymətləndirirlər.
Tehranın Səttarxan və Tehran Pars məhəllələrində də buna bənzər videolar çəkilib.
Martın 14-də yayılan videolarda ali rəhbər ayətüllah Əli Xameneyi və prezident İbrahim Rəisinin doğulduğu Məşhəd şəhərində keçirilən antihökumət etirazları görünür.
Kürdüstan ostanının Sənəndəc şəhərində cavanlar toplaşaraq böyük tonqal qalamış və antihökumət şuraları səsləndirmişlər.
İranın qərbindəki Kamyaran şəhərində isə etirazçılar maşın təkərlərinə od vuraraq mərkəzi küçələri bağlayıblar.
Əslində İranda aylardır davam edən etiraz aksiyaları elə Kürdüstan ostanında başlamışdı.
Xatırlatma
İranda sentyabrın ortalarında, deyilənə görə hicab qaydasını pozduğuna görə polisə aparılan gənc qadın Məhsa Əmini orada vəfat etdikdən sonra bu hadisə ilə bağlı başlanan etirazlar ölkəni bürüyüb.
Polis qadının xəstəliyinə görə vəfat etdiyini bildirsə də, etirazçılar və ailəsi Əmininin döyülərək öldürüldüyünü iddia edirdilər.
Hazırkı küçə etirazları İranda 1979-cu il inqilabından bəri ən böyük həyəcan sayılır.
Ölkənin müxtəlif şəhərlərində qadınlar etiraz olaraq hicablarını atır, yandırır və saçlarını kəsirlər.
Fəalların HRANA agentliyi yanvarın 16-na olan məlumata görə etirazlar ərzində 71-i azyaşlı olmaqla azı 522 nəfərin öldüyünü bildirib.
Bu da xəbər verilir ki, ölənlərin 68 nəfəri hüquq-mühafizə orqanlarının əməkdaşlarıdır.
Ölkədə etirazlarla bağlı 20 min nəfərin həbs olunduğu, bunlardan 100-ü barəsində edamla nəticələnə biləcək hökmlərin çıxarıldığı xəbər verilir.
Osloda mənzillənmiş İran İnsan Haqları Təşkilatı isə bildirir ki, İranda ötən il edam edilənlərin sayı 500 nəfərdən çox olub.
İran etirazlarda iştirakilə bağlı 4 nəfərin edam olunduğunu təsdiq edib.
