27 milyon manatlıq mənimsəmə və rüşvət almaqda suçlanan keçmiş Əmək və Əhalinin Sosial Müdafiəsi naziri Səlim Müslümov bu məbləğin 20 milyonunu ödəyib. İstintaqın hesabladığı ziyandan təxminən 7 milyon manat qalıb. Bu, avqustun 15-də sabiq nazirin məhkəməsində məlum olub.
61-yaşlı Müslümovun işinə Bakı Ağır Cinayətlər Məhkəməsində baxılır. Avqustun 15-də prokuror məhkəmədə ittiham aktını elan edəndə aydın olub ki, Müslümov nazir olduğu dövrdə müxtəlif bölgələrdə (Qazax, Samux, Salyan, Zaqatala) müharibə əlilləri, həlak olanların ailələri üçün fərdi yaşayış evlərinin tikintisində rüşvət almaqda təqsirləndirilir. İddia olunur ki, rüşvət müqabilində həmin evlərin tikintisi müəyyən şirkətlərə, yaxud fərdi şəxslərə həvalə olunub.
Müslümov həmçinin nazirliyin tabeliyində olan qurumların (Dövlət Sosial Müdafiə Fondu, Dövlət Əmək Müfəttişliyi və s.) müxtəlif rayonlar üzrə rəhbər şəxslərini vəzifəyə təyin etmək, müqavilə müddətini uzatmaqdan ötrü də onlardan rüşvət almaqda suçlanır. İttiham aktında təkcə Mərdəkandakı müalicə pansionatının təmir-bərpası prosesində 406 min manatlıq yeyintidən bəhs olunur.
Keçmiş nazir haqqında ittiham aktı 573 səhifədir. Bu üzdən orada yazılanların elanına bir məhkəmə iclası kifayət etməyib. Növbəti iclasda ittihamın elanı davam edəcək və Müslümovun özünü təqsirli bilib-bilmədiyi aydınlaşacaq.
Sabiq nazirin özünün və yaxınlarının adına olan 8 milyon manatlıq əmlakın üzərinə həbs qoyulub.
Xatırlatma
1961-ci il təvəllüdlü Səlim Müslümov 2000-2002-ci illərdə Dövlət Gömrük Komitəsinin sədr müavini, ardınca 11 il Dövlət Sosial Müdafiə Fondunun sədri vəzifəsində işləyib. 2013-cü ildə Əmək və Əhalinin Sosial Müdafiəsi naziri təyin edilib. Həmin vaxt Dövlət Sosial Müdafiə Fondu da bu nazirliyin tabeliyinə verilib.
2018-ci ildə nazir vəzifəsindən azad edilən Müslümov 2021-ci ilin fevralında Dövlət Təhlükəsizliyi Xidmətinin əməkdaşları tərəfindən saxlanılıb, Səbail rayon Məhkəməsinin qərarıyla onun barəsində həbs qərarı çıxarılıb. DTX-nın istintaq təcridxanasında saxlanılan sabiq nazir 2022-ci ilin mayında ev dustaqlığına buraxılıb. O, ev dustaqlığına buraxılarkən səhhətindəki problemlər əsas gətirilib. Lakin yayılan məlumatlara görə, yeyinti nəticəsində dövlətə dəymiş ziyanın bir hissəsini ödəməsi onun həbsdən çıxmasında rol oynayıb.
Müslümov büdcə vəsaitlərinin yeyintisində ittiham olunduğuna görə onun işi üzrə məhkəmədə Maliyyə Nazirliyi zərərçəkmiş qismində tanınıb.
Sabiq nazirə CM-in 179.4 (xüsusilə külli miqdarda mənimsəmə və ya israfetmə), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2 və 311.3.3 (təkrar külli miqdarda rüşvət alma) maddələri ilə ittiham verilib. Bu maddələrdə 14 ilə qədər həbs cəzası nəzərdə tutulub.
