►SOCAR-ın yenidən kredit alması birmənalı qarşılanmır
Azərbaycan Xalq Cəbhəsi Partiyasının (AXCP) sədri Əli Kərimli Facebook səhifəsində yazıb ki, bu, yoxsulluqla amansız mübarizə aparan xalqa qarşı neqativ xəbərdir.
“Avropa futbol çempionatına sponsorluğa 120 milyon manatı yenicə xərcləmiş Dövlət Neft Şirkətimiz (SOCAR) indi də Avstriya bankından 250 milyon dollar kredit aldı. Ötən il “Qazprombank”dan 489 milyon dollar, Azərbaycan Beynəlxalq Bankından 1 milyard 291 milyon manat, 2014-cü ilin dekabrında isə Kanadadan 3.3 milyard dollar kredit almışdılar. Lakin SOCAR dayanmaq bilmir. Avropa Yenidənqurma və İnkişaf Bankı (EBRD), Asiya İnkişaf Bankından 2 milyard dollar, Koreyanın “Eximbank”ından isə 1 milyard avro kredit almaq istəyir”
Əli Kərimli vətəndaşlara xitabən soruşur.
“Fikirləşirsiniz ki, bəs SOCAR bu qədər borcun altından necə çıxacaq? Əlbəttə, bizim hesabımıza. Ya büdcədən, Mərkəzi Bankdan kömək ediləcək, ya da yanacağın qiyməti qaldırılacaq. İndi əmin oldunuz ki, dünyada futbolun, cüdonun və s. inkişafı adı ilə dağıdılan, korrupsiya layihələrilə mənimsənilən pullar bizim pullardır?”
Kreditin alınması və müxalifətin tənqidi fikirləri ilə bağlı SOCAR hələ münasibət bildirməyib.
____________________________________________________________
Bunlara da bax:
Cəbhəçi gəncin cəzası azaldıldı (Yenilənib)
5-10 avro üçün fahişəliyə məcbur olan miqrantlar- [video]
____________________________________________________________
Bu gün bir sıra saytlar məlumat yaydılar ki, “UniCredit Bank Austria” “SOCAR Trading Group”un tərkibinə daxil olan bir neçə şirkətə 250 milyon dollar məbləğində kredit ayırıb.
Kredit müvafiq şirkətlərin ticarət fəaliyyətinə dəstək vermək məqsədilə ayrılıb. Saziş üzrə hüquqi məsləhətçi qismində Böyük Britaniyanın “Norton Rose Fullbright” şirkəti çıxış edir.
Kredit alan mərkəzi ofisi Cenevrədə yerləşən “SOCAR Trading” Xəzərin Azərbaycan sektorundakı Azəri-Çıraq-Günəşli yataqlar blokundan hasil edilən neft və digər məhsulların bazarlarda satışını təşkil etməkdən ötrü 2007-ci ilin dekabrında təsis olunub.
Bir müddət öncə rəsmilər bəyan etmişdilər ki, SOCAR-ın 6.3 milyard dollar borcu var.
Buna da bax: Z.Əlizadə:"Münaqişə danışıqla həll olunmayacaq"
