Quba hadisələri barədə rəsmi qurumlar yeni məlumat yaydı

Quba hadisələri ilə əlaqədar 30 nəfər təqsirləndirilən şəxs qismində istintaqa cəlb edilib.

Baş Prokurorluqla Daxili İşlər Nazirliyinin aprelin 5-də yaydığı məlumatda deyilir ki, onlardan 12-si həbs edilib, 18-indən isə başqa yerə getməmək haqqında iltizam alınıb.

Məlumatda istintaq zamanı təqsirləndirilən şəxslərə qarşı qeyri-insani rəftara yol verilmədiyi bildirilir.

Qubanın sabiq icra başçısı Rauf Həbibovun qubalılar barədə dediyi fikirlər martın 1-də rayonda etiraz aksiyasına səbəb olub. Aksiya toqquşmalar və zorakılıqla müşayiət olunub. İcra hakimiyyətinin yardımçı binaları, icra başçısı Rauf Həbibovun şəxsi evi yandırılıb.

Martın 2-də prezident İlham Əliyevin sərəncamı ilə Rauf Həbibov vəzifəsindən kənarlaşdırılıb.

Quba hadisələrinin istintaqını Respublika Prokurorluğunun Ağır Cinayətlərə Dair İşlər üzrə İstintaq İdarəsi aparır.